После немилите вести на кои сите бевме сведоци во текот на вчерашниот ден и искрено изразеното сочувство до народот во Република Турција и Сирија, денес веднаш презедов иницијатива и во координација со претседателот на Советот на Општина Прилеп, Дејан Проданоски, поднесов барање за одржување на итна седница на Советот, на која што преку одлука ќе бидат обезбедени финансиски средства од буџетот на Општина Прилеп како донација за семејствата на настраданото население. Искрено подаваме рака на целокупното погодено население и до сите градови и општини на нашиот братски народ во Република Турција, вели градоначалниот на Општина Прилеп, Борче Јовчески, во своето соопштение до медиумите.
„Како градоначалник на Прилеп, заедно со претседателот на Советот и општинска делегација, имавме прилика изминативе денови лично да бидиме во Република Турција, во општина Бајрампаша, на покана на почитуваниот градоначалник Атила Ајданер, по повод збратимување на овие две општини и меѓусебна економска, културна и секаква друга соработка.
Веднаш после немилите сцени и настани кои што се случија во земјата, со длабоко жалење, во мојот говор пред градоначалникот, членовите на советот и сите присутни, изразив подготвеност дека нашата општина Прилеп ќе обезбеди финансиска помош во рамките на нашите можности и им понудивме друга помош и логистика доколку е потребно, а со тоа да знаат дека подадената рака значи дека нашата поддршка и солидарност веднаш ќе ја реализираме и дека нашите мисли во овие тешки мигови се искрено со нив!
Воедно упатувам апел до сите наши сограѓани од општина Прилеп во рамките на своите можности доколку се во состојба да помогнат преку Фондот на солидарноста на Црвен крст или телефонските броеви за донација! Секоја помош е добредојдена! Посакувам што побрзо закрепнување на повредените и што поскоро санација на погодените области од овој катастрофален земјотрес, општина Прилеп е со вас“, истакна Јовчески.
Инаку денеска барање за свикување на итна седниица, со точка на дневен ред дававање на помош за настраданите во Турција побараа и советниците од СДСМ во Општина Прилеп.
„Врз основа на чл.25 од Статутот на Општина Прилеп, советничката група на СДСМ и Коалицијата денеска, 07.02.2023 година, до претседателот на Совет на општина Прилеп поднесе барање за свикување вонредна седница, со една точка на дневниот ред: Носење Одлука за давање хуманитарна помош на настраданите граѓани во катастрофалниот земјотрес во Република Турција.
Бараме вонредната седница на општинскиот Совет да се одржи утре, среда 08.02.2023 година, со цел помошта до настраданите да стигне што поскоро. Општина Прилеп е збратимена со две Општини од Република Турција, Тире и Бакиркој. Поради тоа, сметаме дека нашата општина треба да биде меѓу првите која ќе испрати хуманитарна помош до настраданите подрачја и дека носењето ваква Одлука е издржана и оправдана“, велат од ОО СДСМ Прилеп.
