По повод Денот на независноста, утревечер во 19:00 часот во библиотеката „Борка Талески“ во Прилеп ќе биде отворена првата трајна поставка на дела од прилепски автори. Ова е прва ваква поставка во Прилеп и е во сопственост на библиотеката.
Ќе бидат изложени 26 дела од 23 автори, односно скулпури во мермер, дрво, комбинирана техника, потоа уметнички слики работени во разни техники, како и еден мурал.
„Горди сме на оваа поставка, среќни сме што во нашата установа во иднина сите граѓани почитувачи на уметноста, но и сите странски и домашни туристи ќе можат секој работен ден да го посетат ова вредно и репрезентативно културно наследство на градот. Сите ученици ќе може секогаш да ги погледнат делата на нашите врвни авангардни уметници, скулптори, како и делата на репрезентите на новата, млада генерација ликовни творци и вајари“, велат од библиотеката „Борка Талески“ во Прилеп.
Настанот ќе биде збогатен со музички перформанс на прилепското дуо Волчело, односно Андријана Дукоска на виолончело и Илија Волчески на саксофон.
