Во Прилеп можеби за прв пат од неговото основање во 1961 година се санираше Паркот на Револуцијата. Се изврши реконструкција на патеката пред бистите во Алејата на Великаните, сменети се дел од оштетените плочи на бистите, со техника на пескарење се исчистени Урните, а санирани се дел и од скршените плочи во Криптата каде почиваат посмртните останки на 462 партизани. Исто така санирана е дел и од патеката, како и амфитеатарот.
„После подолго време во Прилеп, Могилата на Непобедените, да си го добие своето заслужено место и мислам дека успеавме со тимот од нашиот Завод и Музеј местото на Могилата да го вратиме на пиедесталот, затоа што Прилеп е особено познат по оваа Могила и жртвите кои ги дал за време на НОБ“, вели Горан Цветкоски, директор на Завод и музеј Прилеп.
Од 66 народни херои во Македонија, 15 се од Прилеп. 10 загинале во војната, а 5 починале потоа. Сега се изработувал и проект за изработка на уште 5 бисти кои ќе бидат поставени во Алејата на Великаните. Од Заводот и музеј на Прилеп се надеваат дека идната година на 80 годишнината од ослободувањето на градот од фашистичкиот окупатор тие ќе бидат поставени.
„Се надеваме дека во 2024 година, кога се одбележуваат 80 години од ослобводувањето на Прилеп ќе биде реализирано и ќе ја надополниме Алејата на Народните херои со уште 5 мина, која ја преживеале војната, меѓутоа во текот на слободарските години тие извршувале голем број значајни функции не само во Социјалистичка Република Макдонија, туку и во Социјалистичка Федеративна Република Југославија. Тоа се Вера Ацева, Крсте Црвенкоски, Борко Темелкоски – Лилјакот, Ѓоре Дамески – Боксерот, Атанас Забасноски – Руски“, истакна Рубин Белчески, претседател на Здружението почитувачите на ликот и делото на борците од НОБ Прилеп.
Се реконструираше и постаментот на Споменикот на Песиобрдце кој ја симболизира борбата од последните денови од ослободувањето на Прилеп далечната 1944 година. Инаку во Општините Прилеп, Кривогаштани и Долнени има околу 160 споменици, спомен обележја, бисти или плочи посветени на НОБ. На дел од нив потребна им е потребна итна интервенција за нивна реставрација.
