РЕК Битола во моментов не произведува струја поради дефектот во третиот блок кој настанал во текот на ноќта. Од ЕСМ тврдат дека се започнати активности за враќање на еден од блоковите во мрежа, откако вчера поради пукната цевка на третиот блок, тој остана надвор од функција.
„Во текот на вчерашната ноќ, поради пукната цевка, што е честа појава, Блокот со кој работеше РЕК Битола испадна од мрежа.
Електричната енергија е надоместена од сопствените производствени капацитети и не е направена никаква дополнителна набавка на хавариска струја, и не е направен дебаланс на системот како што се шпекулира.
Веднаш се започнати пуштачки операции за враќање на еден од блоковите на мрежа и денес во попладневните часови се очекува истиот да биде приклучен“, појаснуваат од ЕСМ.
Согласно планот за производство се очекува, како што додаваат, до крајот на неделата да биде ставен на мрежа и вториот блок, додека на почеток на следната недела се очекува сите три блокови да бидат на мрежа.
Од ЕСМ велат дека минатиот период намерно биле исклучени два од блоковите и работел само еден, бидејќи анализата на пазарот покажала дека е поевтино да се купува. Но сепак на сајтот од ЕСМ во делот каде треба јавно да бидат достапни извештаите за тоа од кои фирми, колкави количини и по кои цени државни електрани купиле електрична енергија ги нема од декември кога се објавени и последните вакви извештаи.
