Утре, (22.03.2024 година) во време од 15.00 до 18.00 часот, на плоштадот Александрија во Прилеп, Министерството за одбрана и Армијата на Република Македонија во соработка со локалната самоуправа организираат отворен ден за граѓаните. Настанот е дел од активностите со кои се одбележуваат 75 години од формирањето на НАТО и воедно четири години од нашето членство во Алијансата.
„На отворениот ден, присутните ќе имаат можност да се запознаат со артилериските системи и орудија од артилерискиот баталјон, вооружување, воената опрема и возила од повеќе единици, меѓу кои од пешадиските единици, баталјонот на воена полиција, баталјонот за врски и изидувачко разузнувачкиот баталјон.
Граѓаните исто така ќе имаат прилика да ги проследат борбените вештини на припадниците на баталјонот за специјални сили и алпинистичките вештини на ренџерите од составот на изидувачко разузнувачкиот баталјон. Активноста ќе биде проследена од началникот на генералштабот, генерал-потполковник Васко Ѓурчиновски и претставници од локалната самоуправа.
Отворениот ден во Прилеп е дел од планирани настани кои се организираат во седум градови во внатрешноста и во Скопје со кои ќе се одбележат 75 години од формирањето на НАТО и четири години членство на Република Северна Македонија во НАТО.
Претходно, граѓаните на Струмица, Кавадарци, Штип и Тетово имаа можност да присуствуваат на овие настани, а вакви отворени денови следуваат во Скопје, Охрид и Кичево. Се покануваат граѓаните на Прилеп, новинари, сниматели и фоторепортери да ги проследат активностите на отоворениот ден“, информираат од АРМ.
