Политичките чинители од Прилеп, советници од сите партии и пратеници на чело со градоначалникот застанаа позади барањето на жителите на селото Ореовец да се преземат итни активности за стопирање на ископот за тампон на Бехтел и Енка кој се наоѓа на само 200 метри од нивното село. Тампонот би се употребувал за новиот автопат Прилеп – Битола. Но поради минирањата веќе се оштетени голем број куќи, а загрозени се и дел од изворите за вода на Прилеп и целата животна средина во овој предел.
„Навистина сериозно како локална самоуправа ќе алармираме до соодветните институции, добро да се анализираат сите правила и закони и воедно ќе побараме обраќање и на изведувачот, односно на ЈПДП, дали се спроведени сите услови и члченови за правилно концесионирање во ова подрачје“, истакна Борче Јовчески, градоначалник на Прилеп.
Според пратениците од ВМРО-ДПМНЕ доколку продолжат ископувањата на Прилеп ќе му се случи еколошка катастрофа со повеќе кратни последици. Бараат преиспитување на договорот со Бехтел и Енка и расчитување на сите вакви аномали, затоа што ако се раскинел целосно Македонија ќе платела огромни пенали.
„За овој договор за коj како пратеници на ВМРО-ДПМНЕ, тогаш во опозиција, зборувавме дека е неуставен, криминален и донесен на шверцерски начин со злоупотреба на европското знаменце во повеќе наврати, со анулирање на 9 други важечки закони и со кој на Бехтел и Енка со овој закон се овозможи формирање на вакви чудовишта како што е овој каменолом во Оревоец“, изјави Петар Ристески, пратеник од ВМРО-ДПМНЕ од Прилеп.
Според пратениците пак од Левица од 4 ИЕ договорот со Бехтел и Енка бил неуставен и незаконски, а нешто што не било склучено по закон лесно можело и да се раскине и Македонија да нема обврска да плаќа казни.
„Договорот излезе од еден куп закони и тоа ер класична злоупотреба на службена положба. А во правото има еден прицип каде од неправо не може да произлезе право и ова ќе мора да заврши со кривични пријави и со спроведување на една кривична постапка. Тоа многу лесно ќе се докаже и тоа е еден основ за раскинување на договорот, ако се заврши таа кривично правна постапка, поради тоа од што неправо не може да произлезе прави и според тоа многу лесно ќе може да се раскине договорот и врз основа на таков договор тие не може да бараат надоместо на штета“, кажа Сашко Канчев, пратеник од Левица.
Жителите пак покренаа и судска постапка пред Основниот суд во Прилеп.
„Имаше дојдено претставници ЈПДП заедно со судија од Основне суд Прилеп на кој состанок повторно од ЈПДП не презентираа никаква документација и согласно нашите законски процедури за кои сите знаеме дека се долги и мачни судот мораше да побара од нив повторно во законски рок да ги достават сите документи, што за нас е револтирачки и нечовечки“, вели Рубин Талески, жител на село Ореовец.
Протестите и блокадите на овој каменолом кои траат веќе 4 недели ќе продолжат и во периодот кој следува.
