Експресниот пат Ранковце – Крива Паланка, место наесен, како што најави претходната Влада, ќе биде готов до крајот на оваа година, изјавија денеска директорот на ЈП за државни патишта Коце Трајановски и вицепремиерот и министер за транспорт Александар Николоски кои беа на увид на градежните работи.
Патот кој е долг 25 километри, како што рече директорот на државни патишта, е почнат да се гради во 2018 година и досега се реализирани 80% од работите.
„Патот е поделен на два лота. Едниот лот е од Страцин до Длабочица во должина од 15 километри, а вториот е од Длабочица до Крива Паланка во должина од 10 километри. Вредноста на целокупната инвестиција е 92,7 милиони евра со тоа што првиот лот чини 43 милиони евра, а вториот околу 50 милиони евра“, рече Трајановски и најави дека ќе продолжат да работат на комплетирање на Коридорот 8 чиј дел е и експресниот пат.
Министерот Николоски очекува со пуштањето во употреба на овој пат да се забрза економијата, граѓаните да можат да остваруваат поголеми приходи и да останат да живеат во местата од кои потекнуваат.
„Можам со задоволство да кажам дека овој експресен пат кој, наједноставно кажано, треба со модерно патно решение да ги поврзе Куманово и Крива Паланка, а со тоа Крива Паланка да ја поврзе и со Скопје, главниот град. Тука е и Општината Ранковце која треба да биде поврзана и со Крива Паланка и со Куманово но и со Скопје, да може брзо да се стига од главниот град и до Ранковце и до Крива Паланка, да може да се развие бизнисот, луѓето да приходуваат повеќе и да остануваат да живеат во местата од кои што потекнуваат“, рече Николоски, кој истакна дека истиот ќе го скрати и патувањето од Скопје до Софија на два и пол часа.
Министерот Николоски рече дека патот многу бавно се градел од неразбирливи причини и досега не е завршена целосна експропријација на земјиштето каде што ќе поминува патот, но има и низа други проблеми околу изградбата. Сепак, како што истакна тој, ќе направат сѐ за овој пат да биде завршен до крајот на годината.
