Сириската војска денеска продолжи со своите жестоки напади врз енклавата на бунтовниците во Источна Гута во близина на Дамаск, при што загинаа уште пет лица, а беа повредени повеќе од 200. Со тоа бројот на загинати се искачи на 250 лица во последните 48 часа, вклучително и 60 деца. Стотици се ранети, а болниците не се во состојба да се грижат за сите повредени поради нанесените сериозни штети.
„Сириската армија од воздух бомбардира делови од енклавата во која под опсада на силите на Башар ал Асад од 2013 година, се околу 400.000 жители“, објави Сириската опсерваторија за човекови права (СОХР).
Граѓанската војна сега влезе во седмата година, а Асад се обидува да ја врати територијата што ја држат бунтовниците преку „целосна воена победа наместо постигнување договор“.
Во сириските напади се гаѓаат пекарници, магацини што може да имаат храна, патишта по кои патуваат хуманитарни организации и амбулантни возила, како и други витални средства за опстанок на цивилите. ВО нападите се користат касетни бомби, како и хемиско оружје.
Бројот на жртвите се зголемува, бидејќи медицинските установи исто така се меѓу целите – во понеделникот беа погодени четири импровизирани болници.
„Сведоци сме на масакрот на 21 век. Што е поголем тероризам од убивање цивили со секакво оружје? Дали ова е војна? Ова не е војна. Ова се вика масакр“, изјави еден од лекарите во овој регион.
