Антикорупциската комисија отвори предмет за набавката на воените хеликоптери од италијански Леонардо по опозициските критики за оваа зделка за модернизација по НАТО стандарди со цена од 230 милиони евра.
Под лупа се најде и набавката на 22 амбулантни возила преку тендер на Министерството за здравство.
„Отвораме предмети на сопствена иницијатива, по допрен глас од медиумите, за актуелни случаи пред избори. Двата предмети за набавките на хеликоптерите и на амбулантни возила, со 13 други предмети, значи имаме 15 предмети поврзани со изборниот процес“, изјави Татјана Димитровска, претседателка на комисијата.
Овие предмети се поврзани со забрани за тоа што смеат, а што не смеат да прават функционерите и институциите по 14 февруари, денот кога претседателот на Собранието, Јован Митрески, ги распиша претседателските и парламентарните избори закажани за 24 април и за 8 мај.
Забраните се определени во Изборниот законик и во Законот за спречување на корупцијата и ги регулираат условите за нови инвестиции, вонредни исплати, вработувања….
Реакции кај јавноста имаше и за изнајмувањето на 45 нови автомобили од страна на Владата, во висина од 1.6 милиони евра.
