Ќе биде прогласена енергетска кризна состојба во државата со единствена цел да може да се вбризгаат буџетски средства во енергетските компании како што се ЕСМ и МЕПСО со цел да се зголеми нивната ликвидност за да може да се интервенира во увозот на струја. Рестриктивни мерки во моментот не се предвидени. Министерството за економија и сите институции вклучени во енергетскиот сектор постојано имаат состаноци и будно се следи состојбата на електроенергетскиот сектор во државата.
Министерот Бектеши, на вчерашното гостување на ТВ „Алсат“, најави дека на владина седница, ќе предложи да се прогласи кризна состојба во енергетскиот сектор, а за денеска и за утре ја најави средбата со членовите на Комисијата предвидена во рамки на Уредбата за прогласување кризна состојба.
Колку средства од буџетот, ќе бидат трансферирани за енергетските компании ќе се знае по направените конечни анализи, рече Бектеши, уверувајќи дека Владата има средства за да интервенира во зависност од потребите на енергетските компании, и дека до крајот на годината нема да има поскапување на цената на електричната енергија за домаќинствата и за малите потрошувачи, како што се микро и малите компани.
