Во прилепско Штавица започна најголемиот спелеолошки камп за oваа година во регионот. Учествуваат над 150 учесници од 15 држави, чија цел е истражување на 6 пештери и пропасти во Прилеп и Мариво, развојот на овој спорт, како и усовршување и размена на искуства околу техниките за спасување, кои се дел од клучните активности на спелеолозите кај нас.
„Кај нас од прилика имаме истражено околу 40%, се надеваме дека овој камп е голема можност за сите спелеолози кои се тука во Македонија, а и регионално да можат да ја запознаат нашата околина, да истражуваме заедно и да придонесеме за развој на авантуристичкиот туризам, развој на спелеологијата и секако да допридонесеме за оние недопрени нешта кои се наоѓаат во подземниот свет. Скоро во сите пештери има некои канали во кои никогаш немаме влезено и се надеваме дека некои од тимовите кои ќе учествуваат ќе допридонесат и ќе отворат некои нови канали“, вели Дарко Неданоски, претседател на Спелеолошка федерација на Македонија.
„Ова е одлична можност за споделување на знаење, да учиме од другите, да се споделат искуства и да се донесе заедно се што е подземја и да се претстави пред светот. На овој начин можеби можеме да го зголемиме туризмот и ова е одлична можност за регионот, бидејќи е фантастичен“, рече Ема Марчу, претседател на Балаканска спелеолошка унија.
Учесниците на кампот очекуваат дека ќе имаат можност што е можно подобро да се запознаат со нашиот подземен свет.
„Јас сум млад истражувач на пештери, обожавам да истражувам и среќен сум што ќе имам можност да ги истражувам пештерите во околината на Прилеп. Имам големи очекувања и мило ми е што сум тука“, кажа Алекс Кристија, учесник на кампот од Романија.
„Истражувам пештери веќе 4 години, сега сме на Балканот, во многу земји, на експедиција сме од март, веќе 6 месеци, во сите балкански земји истражувајќи пештери и кањони“, додаде Милер Кабаљеро, учесник на кампот од Шпанија.
Ова е и одлична можност за туристичка промоција на Прилеп и неговата околина.
„Иако во помала група, сепак привлекуваат луѓе кои за прв пат доаѓаат овде и се надевам преку нивната порака која ќе ја однесат во матичните земји и во земјите каде дополнително ќе организираат вакви кампови дека ќе го пофалат Прилеп и неговата околина. Секоја година очекувам се повеќе и повеќе туристи од овој тип“, изјави Дејан Проданоски, градоначалник на Прилеп.
Кампот беше свечено отворен со традиционални македонски игри и песни, а ќе трае 4 дена односно до 20 септември.
