Она што на сите ни е јасно, е дека борбата нема да биде ни малку лесна. Бидејќи, после 4-годишното владеење на ДПМНЕ, нам и на сите граѓани во „наследство“ ни останува пустошен и обезличен град, запуштени и испустени села, осиромашени граѓани. Наместо ред – донесоа хаос. Наместо подобар живот – поскап живот, истакна вечерва во Прилеп, Петра Лукароска, кандидат за градоначалник од СДМ и коалицијата.
„А поскапеа се’ што можеа да поскапат – водата, данокот на имот, комуналиите, градскиот превоз, паркингот. Но, повисоките цени на услугите не ја подобрија финансиската состојба на јавните претпријатија. Напротив – сите до едно станаа загубари со вкупен долг од над 2 милиони евра. Сето ова се случи со знаење и аминување на тогашниот претседател на Совет на општина Прилеп, Дејан Проданоски.
Партиските директори од тефтерчето на Проданоски се тие кои ги доведоа пред банкрот јавните комунални претпријатија и удрија по џебот на граѓаните. Како претседател на Совет во период од 3 години, Проданоски има подеднаква ако не и поголема вина од градоначалникот Јовчески, што Прилеп го допре дното.
Тандемот Јовчески-Проданоски има директна одговорност за уништениот спорт, за бришењето на „Победа“ од фудбалската мапа, за „евакуацијата“ на младите од родниот град, за узурпираните јавни површини, за темните, раскопани, нечисти и празни улици од кои демнат глутници кучиња скитници Конечно, и двајцата имаат вина за она според кое Прилеп е лидер во државата – бројот на запалени возила, фрлените бомби во угостителски објекти и семејни куќи, насилството на улиците.
Зад ДПМНЕ, Јовчески и Дејан Проданоски, почитувани сограѓани, остана пустош и огромно разочарување! Драги пријатели, Стојам пред вас свесна за одговорноста која ја презедов, но цврсто убедена во исправноста на таквата одлука. Оти мојот принцип на функционирање, како во политиката така и во животот, е соочување со предизвиците а не бегање од нив.
Ова е еден од таквите моменти. Изборната програма која ја работевме заедно со моите сопартијци и со граѓани од сите урбани заедници и населени места, кандидатската листа за членови на општинскиот Совет, поддршката која секојдневно ја добивам од знајни и незнајни сограѓани, но и поддршката од претседателот Филипче и партиското раководство, значат силен ветер во грб и силна верба во успех. На сите ним, на сите вам, ви велам едно големо БЛАГОДАРАМ!
За Прилеп се бориме со идеи, со уште повеќе проекти, а најмногу со љубов. Нашата програма не е список на желби. Секој проект има своја цел и намена.
- Изградбата на две паркинг-платформи над градската река кои значат нови 100 паркинг места, толку неопходни за намерниците и посетителите на чаршијата и градскиот пазар;
- „Топташ Скајлајн“, модерен урбан проект, спој на природата со современите урбани трендови на рекреација и одмор;
- Младински центар, простор за креативност, учење и дружење на младите;
- Три нови велосипедски патеки; Обнова на некогашниот планинарски дом „Дервен“;
- Фотоволтаици на покривите на сите општински објекти, за еколошки и енергетски “паметен“ град;
- Реконструкција на Старата чаршија;
- Два кружни тека за решавање на сообраќајното “слепо црево“ кај новата автобуска станица; Уредување на „Дабнички канал“;
- Нови содржини во спортско-рекреативниот комплекс кај вештачкото езеро;
- Изградба на уреден паркинг и асфалтирање на обиколницата околу новите градски гробишта.
Но, не е само новоизградената и реконструирана инфраструктура таа која ќе го смени ликот и карактерот на градот.
За нашиот дом ќе се бориме со враќање на безбедноста во секое маало, во секоја улица и населено место, подигнување на образованието на повисоко ниво преку создавање подобри услови за учениците и наставниците.
Поддршка на културата, уметноста, традицијата и фестивалите, како најдобри промотори и чувари на нашиот идентитет“, рече Лукароска.
