Вилата Извор или Објект 99, како што ја викаат мештаните и работниците на Националниот парк Плитвице, сместена далеку од погледите во скриениот дел од паркот, денес е само урнатина на спомените на некогашниот сјај.
При изградбата, Вилата Извор важела за најскапата претседателска резиденција. Градена е по Втората светска војна, од страна на политички затвореници.
Кодното име резиденцијата наводно го добила по 99-те затвореници што ги изградиле темелите. Додека била во полн сјај, тука доаѓале политичари, пријатели и елитни гости за да се дружат или да одржуваат состаноци со Тито. Понекогаш оделе и во лов. Во салите за состаноци се воделе тајни разговори, а потоа се опуштале со виски и цигари.
Вилата имала и куглана, сала за билјард, дури и кино. Ако испиеле чашка повеќе или ако отседнувале да одморат на неколку дена, гостите се сместувале во елитните апартмани.
Ретко кој знаел дека вилата располага и со таен подземен тунел долг 80 метри, кој служел како таен излез при вонредни ситуации.
Но сепак раскошот и сјајот на минатите времиња денеска е потполно исчезнат.
