Со почетокот на новата учебна 2025/2026 година, како Локална самоуправа на Општина Прилеп испраќаме силна порака за поддршка на образованието, за еднакви можности и за посветена грижа за секое дете, велат во своето соопштение од Општина Прилеп.
Во пресрет на новата учебна година, реализиравме повеќе значајни мерки и инвестиции:
- Направени се реконструкции и опремувања во сите основни и средни училишта, со што обезбедивме подобрени услови за сите ученици.
- Обезбедивме бесплатен здрав оброк за учениците од I до III одделение – мерка што продолжува и оваа година.
- 6.000 ученици во основното образование ќе добијат бесплатни училишни униформи, со што обезбедуваме еднакви и достоинствени услови за сите, а почетен прибор ќе доделиме на првиот училишен ден за сите првачиња.
- Изградена е нова спортска сала во ООУ „Блаже Конески“, инвестиција од околу 23 милиони денари, која ќе овозможи поквалитетен физички развој на учениците.
- Од 1 септември започнува и бесплатниот училишен превоз за учениците од населените места. Новитет е воведувањето линиски превоз кој ќе можат да го користат и останатите жители на населените места, а не само учениците.
- Инсталирани се осум прочистувачи на воздух, обезбедени од Владата на Република Македонија – шест во спортските сали на основните училишта и два во градинките. Заедно се грижиме за подобрување на квалитетот на воздухот каде што престојуваат нашите најмили.
Нашата цел е секој ученик да ја започне учебната година со насмевка и мотивација, а образованието да биде гордост и радост за сите. Вложуваме во образованието – вложуваме во нашата иднина!
