Дело на британскиот уличен сликар, кој се потпишува како Бенкси, е продадено денеска на аукција за речиси 20 милиони евра, а парите се наменети за здравствениот систем на Велика Британија, кој се бори против коронавирусот.
Сликата „Game Changer“, која првично е проценета меѓу 2,5 и 3,6 милиони фунти, е продадена за 16,75 милиони фунти (19,45 милиони евра), соопшти аукциската куќа Кристи, а парите би требало да отидат кај целиот персонал на британската здравствена служба НХС.
Сликата од мај 2020 година виси во ходникот на болницата во Саутемптон. На неа е прикажано момче кое во раката држи кукла-медицинска сестра со маска и капа на супер-херој, додека во корпата покрај него лежат кукли Супермен и Бетмен.
Бенкси во порака до вработените во болницата пред околу една година напиша: „Благодарам за сѐ што правите“. Тој изрази надеж дека сликата ќе го „осветли“ местото „иако е само црно-бела“. Уште тогаш се знаеше дека сликата ќе биде дадена на аукција за да се соберат пари за НХС.
