НАСА најави две нови мисии на Венера наречени „ДаВинчи +“ и „Веритас“, чија цел ќе биде да ги истражат атмосферските и геолошките карактеристики на планетата.
„ДаВинчи +, кој ќе се состои од летало и сонда, ќе го измери составот на густата и топла атмосфера на Венера, што треба да им помогне на научниците да утврдат како еволуирала, а задачата на Веритас е да ја исцрта нејзината површина за да се обиде да ја разбере нејзината геолошка историја“, велат од НАСА.
Најблиската планетарна братучетка на Земјата, втора планета по оддалеченост од Сонцето, е со структура слична на Земјата, но е малку помала и многу потопла. Над непријателската површина се протега густа и токсична атмосфера составена пред се од јаглерод диоксид и облаци од сулфурна киселина. Резултатот е ефект на стаклена градина што ја пржи површината на Венера на 880 степени, доволно за да се раствори оловото. „Воздухот“ на Венера е толку густ што повеќе делува како течност отколку како гас.
Мисијата има за цел да открие зошто Венера денес изгледа како пекол, иако некогаш имала многу од карактеристиките на Земјата и можеби била првата населена планета во Сончевиот систем, со океани и клими слични на Земјата.
Овие мисии вредни околу 500 милиони долари треба да започнат во периодот помеѓу 2028 и 2030 година.
