Во наредните седумдесетина дена граѓаните ќе може да купуваат околу илјада производи по намалени цени откако денес на сила стапија одлуките на Владата за ограничени скалести маржи и замрзнати цени.
Од Државниот пазарен инспекторат велат дека трговците на големо и мало од денеска имаат обврска да ги усогласат цените на производите согласно Одлуките на Владата, а 50 тимови на инспектори се подготвени, излегуваат на терен и за непочитување на владините одлуки предвидени се високи парични казни.
„Согласно Законот за трговија и Законот за заштита на потрошувачите, глобите за непочитување на Одлуките се движат од 500 до 10.000 евра. Инспекторите на Државниот пазарен инспекторат од денеска се на терен и ќе вршат контроли за да се утврди дали трговците постапиле во согласност со Одлуките во рамки на нивните надлежности“, велат од ДПИ.
Од Организацијата на потрошувачи велат дека секоја мерка е за поздравување но потсетуваат дека треба да се внимава да не ни се случи да после завршување на мерките граѓаните да се соочота повторно со високи цени. Појаснуваат дека се потребни подолгорочни мерки во интерес на граѓаните и потенцираат дека е потребно доследно спроведување на Законот за нефер трговски практики.
