Вицепремиерот Бујар Османи не се согласува со изјавата на експремиерот Зоран Заев дека таму каде што нема 20 проценти албанско население таблите на локалната самоуправа и подрачните единици на министерствата како што се Прилеп и Велес не требa да бидат двојазични и дека тие се поставени по грешка.
Според Османи, Општина Прилеп, во која припаѓа и Општина Долнени, бројката е над 20 насто, што значи таблите треба да бидат двојазични, исто како што е и Општина Велес во која со селата има бројка од 20 отсто албанско население.
„Законот е јасен и не треба да го толкуваме ние политичарите. Ајде да оставиме агенцијата и инспекторатот да го имплементираат“, рече Османи.
Заев, пак, денеска на прес-конференција изјави дека двојазичната табла поставена на зградата на Јавното обвинителство во Струмица наскоро ќе биде отстранета затоа што е поставена по грешка оти во Струмица нема повеќе од 20 проценти население од албанска етничка заедница.
„Во Кочани беше отстранета и на други места се отстранети, така што низ призмата на чесното почитување на Законот, она што Законот го предвидува е практичната потреба на граѓаните. И употребата на јазикот е заради практична потреба, не е за изнаселување на една заедница врз друга, туку за меѓусебно почитување на правата на употребата на мајчиниот јазик“, рече Заев.
