Со авион на компанијата „Кам Aир“ синоќа околу 23.30 преку Тбилиси, Грузија на Меѓународниот аеродром Скопје пристигнаа првите 149 граѓани на Авганистан кои ќе бидам привремено згрижени во Македонија. Тие ќе бидат сместени во хотели на периферијата на Скопје.
На дело ја демонстрираме нашата солидарност и нашето топло добредојде за оние на кои им е најпотребно, истакна министерот за надворешни работи по синоќешното пристигнување на првата група бегалци од Авганистан на скопскиот аеродром.
„Ја пречекав првата група 149 граѓани на Авганистан, за кои Република Македонија изрази подготвеност да им биде привремено живеалиште и прибежиште. Тоа се семејства, претежно жени и деца, кои биле вработени или биле соработници во меѓународните организации, наши сојузници изминативе 20 години таму. За жал, не по нивна волја, на овие луѓе денес, но и на нивните семејства им е загрозена безбедноста, загрозени им се нивните животи, и затоа ние одлучивме да им помогнеме сега, денес, веднаш – т.е. кога им е најмногу потребно“ напиша Османи утринава на неговиот профил на Фејсбук.
