Во близина на железничката пруга, во непосредна близина на Стопанскиот двор на ЈКП „Комуналец“, денеска избувна пожар. Со брза и навремена интервенција на екипите на ТППЕ Прилеп и вработените во ЈКП „Комуналец“, со противпожарни возила и градежна механизација, пожарот е целосно ставен под контрола, истакнуваат во соопштението од Општина Прилеп.
„Најважно е да знаете дека нема опасност по платото за селекција на отпад, ниту опасност од понатамошно ширење на пожарот. Ситуацијата е целосно под контрола. По последните случувања во Прилеп, со право секој нов инцидент предизвикува загриженост кај граѓаните. За жал и за овој пожар постојат сомнежи дека можеби е намерно предизвикан, а за тоа последниот збор ќе го имаат соодветните институции.
До надлежните органи се доставени сите расположливи информации и докази и очекуваме во најкус можен рок да се утврдат причините и, доколку се потврдат сомнежите, да се откријат сторителите. Упатуваме апел до сите граѓани, да бидеме свесни, совесни и одговорни, да не шириме непроверени информации и да не создаваме непотребна загриженост помеѓу граѓаните.
Да си го чуваме нашиот град. Прилеп не смее да биде на удар. Благодарност до припадниците на ТППЕ Прилеп, вработените во ЈКП „Комуналец“ и до сите кои учествуваа во брзата, и професионална реакција“, велат од Општина Прилеп.
