Планинарски друштва и рекреативци, револтирани од забраната за движење во шума и шумско земјиште, донесена од Министерството за земјоделие, шумарство и водостопанство, поднесоа барање до Владата и Министерството за внатрешни работи повторно да се разгледа и да се укине оваа забрана.
Од работната група, составена од над 1.100 члена организации и физички лица, велат дека забраната за движење во шума и шумско земјиште од 6 до 20 часот поради „зголемената опасност од појава на пожари на отворен простор“, бесправно ги спречува граѓаните на рекреативно движење и е донесена без никаква најава, анализа, ниту пак период на траење.
„Според Универзалната декларација за правото на човекот ‘секој има право на слобода на движење и избор на престојувалиште во границите на одделна држава’, според Уставот на Македонија секој граѓанин има право слободно да се движи на територијата на Републиката и слободно да го избира местото на своето живеалиште, според препораките на СЗО движењето во шума е добродојдено за менталното и физичкото здравје на луѓето во услови на пандемијата со ковид-19…
Бараме отчет врз база на која анализа, индикатори и аргументација се донесе мерката, без консултативен процес со засегнати страни – граѓаните, на тотално недемократски и авторитарен начин.
Сметаме дека оваа мерка не е целисходна – се објавува во период кога голем дел од планинските и шумските предели се сѐ уште под снежна покривка или се со влажна почва од неодамнешните врнежи, а временските прилики не сугерираат поволни услови за ширење на пожари.
Планинарите и рекреативците не се закана за ширење на пожари – надлежните служби нека преземат други мерки ефикасно доколку доследно ги спроведуваат важечките закони и прописи кои се однесуваат на заштита на природата и на шумите.
Забраната за движење во шума и рекреативни места претставува кршење на човековото право на слободно движење и кршење на уставно право на граѓаните. Целосно е неразумно Владата и институциите да воведуваат дополнителни отежнувачки мерки кои крајно негативно ќе влијаат на психофизичката состојба на значителен дел од популацијата, укинувајќи ги сите опции за разумно и одговорно изложување на сончевите зраци и благотворното дејство на кислородот и чистиот воздух.
Препорака на Светската здравствена организација е да се носат мерки кои нема да бидат контраиндицирани со психофизичкото здравје на популацијата. Последнава мерка е токму таква – директна закана и ризик за влошување на психофизичкото здравје.
Mинистерот за земјоделство, шумарство и водостопанство кажа дека мерката се однесува на шумите кои ги стопанисува ЈП Национални шуми, а тоа се 90% од шумите во државата. Спомна дека забраната не се однесува на заштитени подрачја, парк-шуми, излетнички места и националните паркови. Точна инфромација со дистинкција кои планински подрачја спаѓаат под Национални шуми, а кои не, нема објавено никаде.
Бараме под итно Министерството за земјоделство, шумарство и водостопанство да ја укине забраната за движење по планините, со што ќе овозможи слободно движење во природните предели на државата, во шумите и на планините, на одговорни индивидуи чија единствена цел е зачувување на здравјето и уживањето во природа“, се вели во барањето на дваесетина планинарски друштва и во петицијата потпишана од повеќе од 5.200 граѓани.
