Трговците доставија предлози за намалување на цените на групи производи. Реално практично е да се ограничат цените на 100 до најмногу 200 производи, а не на 1.000, како што бараше Владата, велат од Комората на трговците и предлагаат намалување на маржите од 3 до 15 отсто за различни производи.
За брашното, маслото, млекото и за шеќерот, да се пресметува маржа од 3 отсто, а лебот, тестенините, квасецот, солта, кафето, рускиот чај и за одделни видови сирење, урда, јајца, за некои видови зеленчук и овошје, како и за одделни пијалаци и средства за хигиена, маржата може да се ограничи на 10 до 15 отсто. Мерката би важела од 22 март до 22 април. Тоа значи дека и за Велигден ќе има пониски цени, но и за Рамазан.
Претходно Владата најави дека ќе се замрзнат бруто-профитните маржи на трговците и на дистрибутерите на 10% до крајот на април. Тоа беше реакција по извештајот на Државниот инспекторат дека кај трговците на мало имало маржи повисоки и од 20% на основните прехранбени производи и повеќе од 30% кај средствата за лична хигиена, додека кај увозниците и кај дистрибутерите се евидентирани повисоки маржи кои одат дури и до 50%.
Со Предлог-одлуката требаше да бидат опфатени основните прехранбени производи на истите 73 групи на производи кои беа во претходните кошници, но и детергентите, бебешката храна и други непрехранбени производи кај кои е забележана многу висока маржа, а се дел од основните потреби на граѓаните.
Но, по реакција на трговците дека ќе се затворат повеќе синџири на маркети и ќе бидат отпуштени 4.500 работници, Владата одлучи да разговара со трговците и со дистрибутерите и да се подготват нови предлози. Утре ќе биде појасно во која насока ќе тргнат тие разговори.
