Македонија назадува во владеењето на правото и борбата со корупцијата според најновиот извештај на Фридом Хаус насловен Државите во транзиција.
Во извештајот, Македонија, заедно со Албанија, Црна Гора, Босна и Херцеговина и Ерменија е сместена во групата „циклични хибриди“ во кои редовните промени на владејачките елити спречуваат значителни структурни промени.
Извештајот предупредува на долготрајната корупција на високо ниво во Северна Македонија, а го забележува и судирот на партиите околу уставните амандмани потребни поради бугарското вето за пристапување на земјата во Европската Унија.
„Ниту Груевски, ниту неговите најблиски соработници не беа изведени пред лицето на правдата за нивните злоупотреби на функцијата пред 2017 година. Уште полошо, со контроверзните измени на Кривичниот законик во 2023 година се намалија казните за таквите злоупотреби предизвикувајќи да бидат отфрлени големи случаи, додека јавноста веќе се оптоваруваше од фатални корупциски скандали во здравствениот сектор“, се вели во извештајот.
Назадувањето е видливо и во регионот, каде пад на оценката бележат Црна Гора и Босна и Херцеговина, а најголем пад бележи Србија. Од земјите во регионот непроменета е оценката во однос на претходната година за Хрватска, Косово и Албанија.
