Холандија го укинува задолжителниот карантин од 10 дена за целосно вакцинираните патници од групата високо ризични земји, каде спаѓа и Македонија, соопшти министерството за надворешни работи (МНР). Исто така, и Шведска ја укинува привремената забрана за влез во земјата за нашите граѓани.
„Со најновата одлука усвоена од Владата на Кралство Шведска, луѓето кои патуваат во Шведска и коишто можат да презентираат сертификат за вакцинација издаден во Македонија, Сан Марино, Швајцарија, Турција, Украина или Ватикан, се ослободени од забраната за влез и од условите за тестирање“, соопштија од МНР.
Оттаму додаваат дека поради високата стапка на вакцинација, слични олеснителни мерки се најавени и од Белгија, и тоа почнувајќи од први октомври.
На следниот линк, подетални информации за протоколите на патување во сите држави во светот: https://mfa.gov.mk/mk/page/1706/informacii-za-covid19.
