Единствената заштита од ковид-19 во овој момент доаѓа со вакцинација. Но, во иднина, тие вакцини би можеле да доаѓаат преку инхалатори или таблети, пишува Би-Би-Си.
Во лабораторијата во селото Медикон, еден од најголемите научни паркови на југот на Шведска, хемичарката Ингемо Андерсон работи на тенок, пластичен инхалатор со големина половина од кутија за кибрит.
„Тие се лесни и навистина евтини за производство“, рече Јохан Ваборг, извршен директор на компанијата Иконово.
Компанијата Иконово соработува со стартапот за имунологија во Стокхолм (ISR) што разви вакцина против ковид-19 во форма на прав. Таа користи лабораториски произведени протеини на вирусот ковид-19, за разлика од „Фајзер“, „Модерна“ и „АстраЗенека“, кои користат РНК или ДНК за кодирање на протеини, пишува Би-Би-Си.
Прашокот може да се чува на температура до 40 ° C, што е голема предност во однос на моментално достапните вакцини одобрени од Светската здравствена организација (СЗО), кои мора да се чуваат во стаклени шишиња на температура под -70 ° C, пред да бидат пренесени до фрижидери.
Компанијата во моментов ги тестира своите вакцини на бета (јужноафриканска) и алфа (британска) варијанта на ковид-19. Оттаму веруваат дека нивната вакцина би била особено корисна во Африка, каде што во моментов нема домашни производители на вакцини, а потоплата клима и ограниченото снабдување со електрична енергија се покажаа проблематични во однос на складирањето и испораката на вакцините против коронавирусот.
Досега оваа вакцина во прав е тестирана само на глувци, иако ISR и Iconovo собраа доволно пари за да започнат со студии за луѓе во следните два месеци. Како што истакнува Би-Би-Си, во медицинската заедница веќе постои оптимизам дека, доколку вакцините во прав како оваа се покажат успешни, не само што може да биде револуционерен глобален одговор на пандемијата на коронавирусот, туку и да го олесни нивното чување и дистрибуција за други болести.
