Синоќа во Битола СДСМ и Коалицијата го одржаа својот прв митинг на кој ги претставија кандидатите за градоначалници кои ќе учествуваат на претстојните локални избори во Република Македонија. Лидерот на СДСМ, Зоран Заев истакна дека програмата на СДСМ и коалицијата за општините во Република Македонија се потпира на 4 столба.
„Првиот – градиме по план и во договор со заедницата за потребите на сите граѓани. Градиме квалитетно и одговорно со материјали кои траат и издржуваат, без импровизации, без провизии. Второ, работиме за чиста вода и чист воздух. Имаме план како да ги организираме комуналните претпријатија, да ги намалиме трошоците и подобриме услугите. Трето – насочуваме повеќе пари кај граѓаните за повеќе можности за сите. Ја активиравме спиралата за покачување на платите, носиме директна поддршка за домашните фирми пред се за малите и средни претпријатија кои се потпора за секоја општина. Четврто – градиме отворена и услужна општина за сите. Граѓаните ќе ги добиваат сите потребни услуги на едно место и ќе ги вклучиме во креирањето на буџетот кој ќе се користи домаќински“, истакна Зоран Заев, премиер и лидер на СДСМ.
Претседателот на СДСМ рече дека новата ера била дојдена од 31 мај кога завршил стравот, дојде слободата, а доаѓале и правдата и живот за сите. Тој ги повика граѓаните да го заокружат бројот 19 на локалните избори на 15 октомври. Заев потсети и на владините политики и ефектите во економскиот дел кои, како што рече, ги чувствуваат сите граѓани во Република Македонија.
„Трајно го решивме проблемот на стечајните работници за околу 3.000 лица и нивните семејства. Исправивме една голема неправда и срам. Ги намалуваме трошоците за живот и овозможуваме повеќе пари да останат во сечиј семеен буџет. Ја воведовме младинската гаранција за да ги реализираме идеите од прв приоритет, а тоа се работни места за младите, зборот е збор“, додаде Заев.
Заев истакна и тоа дека кандидатите за градоначалници од СДСМ и коалицијата се луѓе кои ги споделуваат вредностите на Македонија, чесни, искрени и луѓе домаќини. Кандидатите за градоначалници се луѓе кои обединуваат, а меѓу нив и идниот градоначалник на Битола, Наташа Петровска, која пак најави победа во првиот изборен круг, односно на 15 октомври.
„Овие избори, се избори за Битола поинаква, поубава, посреќна! Битола перспективна! Битола за сите! Од овој плоштад потсетувам дека општина Битола е многу повеќе и затоа секаде ќе допрат нашите дела“, истакна кандидатот за градоначалник на Битола, Наташа Петровска.
Пред граѓаните на Битола беа претставени и кандидатите за членови на општинскиот Совет. Предизборниот караван на СДСМ претходно, беше и во Ресен и во Демир Хисар.
„Станува јасно дека на 15 октомври заедно ќе ги заокружиме промените што носат живот во Македонија за сите. Од Ресен борбата за живот ја продолжуваме низ секое село, низ секој град, во оваа наша убава Македонија. Нашата Македонија се менува на подобро, тоа го гледаат сите, тоа светот го признава, сите тоа го почувствуваа и нема враќање назад. Се менува Македонија благодарение на вашата силна верба дека ова парче убава земја може да биде достоинствено место за живот“, истакна лидерот на СДСМ Зоран Заев во Ресен.
Новата Влада предводена од СДСМ, како што посочи Заев, била одговорна и домаќинска власт која била свртена кон потребите на граѓаните, достапна, отворена и отчетна.
