Владата на Република Македонија на својата 37 седница, што се одржа синоќа, го разгледа и усвои Предлог Буџетот на Република Македонија за 2018 година, и донесе заклучок предлогот за буџетските трошоци за наредната година да биде пуштен во постапка на дебата и усвојување во Собранието на Република Македонија.
Според податоците што министерот за финансии, Драган Тевдовски ги презентираше пред јавноста, граѓанските организации и пред претставниците на стопанските комори, буџетот за 2018 година тежи 3,4 милијарди евра, а буџетскиот дефицит е планиран на 2,7 проценти од домашниот бруто-производ.
На оваа седница владата го разгледа и усвои и Предлог Законот за извршување на Буџетот на Република Македонија за 2018 година. На предлог на Министерството за финансии, владата на оваа седница го разгледа и усвои документот за Фискална стратегија на Република Македонија за 2018-2020.
Исто така на синоќешната седница владата го разгледа и предлог-законот за изменување и дополнување на законот за персоналниот данок на доход. Со предложените измени, граѓаните веќе нема да имаат обврска да поднесуваат даночна пријава. Отсега тоа ќе го прави Управата за јавни приходи а граѓаните ќе треба само да ги потврдат или коригираат информациите во пријавата.
