Студено време со снежни врнежи го зафати северозападниот дел на Балканскиот Полуостров. Снегот предизвика проблеми во сообраќајот во Словенија, Хрватска и БиХ, а за Црна Гора е издаден „црвен“ метео аларм.
Во Сараево во текот на ноќта паѓаше снег, а метеоролозите најавуваат тоа да продолжи и следните денови.
Снегот во Хрватска, направи проблеми во сообраќајот. Затворени се неколку линии на траекти, а снегот предизвика и проблеми во копнениот сообраќај.
Европската мрежа на метеоролошки сервиси објави за денеска црвен метеоаларм за целата територија на Црна Гора. Алармот е на сила поради исчекување на силен дожд од најмалку 50 мм за 12 часа, ветер со јачина од 50 км на час и силни грмотевици.
Кај нас времето е претежно облачно со повремени локални врнежи од дожд, кои повеќе ќе бидат застапени во западните и северните делови. Ќе дува слаб до умерен ветер од источен правец. Максималната температура ќе биде во интервал од 12 до 18 степени. Во Скопје температурата до 15 °C.
