Конфедерацијата на слободни синдикати (КСС) останува на ставот во среда да одржи предупредувачки протест пред Владата на Република Македонија.
Раководството на КСС денеска на прес-конференција посочи дека до денеска немаат добиено покана од Владата и ресорните министерства за средба на која би се разговарало за заеднички прифатливи решенија за нивните барања.
Ваквиот однос, истакнаа од КСС, не е прифатлив и членството е подготвено во среда да излезе на протест пред Владата.
„Бараме повисока плата за достоинствен живот, усогласување со минималната плата, исплата на К-15 во јавниот сектор, пристојна работа без притисоци и мобинг на работното место, исплата на дотатоци на плата по теркот на народните пратеници, поголеми бенефиции преку колективните договори и почитување на колективните договори во целост, да се слушне гласот на репрезентативните синдикати и да нема реформи за работниците без репрезентативните синдикати“, рече претседателот на КСС, Благоја Ралповски.
За следните чекори што ќе ги преземат, меѓу кои и дали навреме ќе почне второто полугодие од учебната година, ќе одлучат дополнително.
