Вејн Руни најверојатно по крајот на сезоната ќе го напушти тимот на Евертон и ќе се пресели во МЛС лигата, пренесуваат англиските медиуми.
Напаѓачот веќе одржал разговори со челниците на Ди Си Јунајтед, но и на Евертон, и сопствениците на клубот покажале намера да го пуштат да си оди доколку тој тоа навистина го сака.
Ако може да им се верува на спортските медиуми од Островот, Вејн Руни и Ди Си Јунајтед веќе се во поодмината фаза од преговорите и единствено што се чека е да се отвори трансфер периодот во Премиер лигата за Англичанецот и официјално да премине во американскиот клуб.
Во моментов е водечки стрелец на клубот од Ливерпул со 11 голови. Но, неговиот учинок е сепак далеку од оној на кој бевме навикнати до пред неколку години, кога тој ги освојуваше домашните лиги и купови, како и Лигата на шампионите.
Руни пристигна во Манчестер Јунајтед во 2004 година и испиша историја на „Олд Трафорд“ каде остана се до 2017 година. Минатото лето се врати во Евертон, но најверојатно веќе го кажа последниот збор во Премиер лигата.
