Од први јули вакцини против пневмокок и рота вирус

Од први јули децата во Македонија ќе може да примаат две нови вакцини за заштита од пневмокок и рота вирус. Владата ја прифати информацијата за прогресот на активностите во реализацијата на Акцискиот план за воведување на вакцинација за заштита од пневмокок и рота вирус.

 

Во текот на овој месец до службите за имунизација ќе бидат дистрибуирани по 90 илјади дози од обете вакцини. Почнувајќи од следниот месец, родителите коишто сакаат нивното дете да прими некоја од вакцините, ќе имаат можност за тоа.

 

„Најдобриот начин да се заштитат децата од пневмокок и рота вирус е преку вакцинација. Таа е клучен приоритет и придобивка за јавното здравје и токму затоа активностите за промоција на имунизацијата продолжуваат во континуитет“, соопшти Владата.

 

Вакцината за рота вирус се дава кај бебињата на возраст од два, четири и шест месеци, а пневмококната вакцина кај деца на два, четири и дванаесет месеци.

 

Рота вирусот предизвикува сериозен инфективен вид на гастроентеритис (воспаление на стомакот и цревата). Кај некои луѓе нема симптоми, но кај многу малите деца е поголема веројатноста да дојде до сериозни симптоми – од благ пролив до пролив опасен по живот, кој предизвикува дехидрација (губење на течности) и за кој е потребно болничко лекување и може да доведе до смрт. Децата може да се заразат со рота вирусот ако нивната храна, вода или раце се загадени со измет на заразено лице.

 

Пневмококи се бактерии што продизвикуваат воспаление на белите дробови.

 

 

Не е дозволено преземање на оваа содржина или на делови од неа, што се однесува на текст, фотографија и видео, без дозвола од редакцијата на ИНФО КОМПАС.