Шефот на Мисијата на ОБСЕ во Македонија Клеменс Која денеска изрази загриженост во врска законот за специјалното јавно обвинителство, што е предмет на разговори меѓу владејачките партии и опозицијата, како и за мандатот на СЈО и ги повика сите партии да постигнат согласност и да се овозможи СЈО да продолжи непречено да работи.
Тој во обраќањето на презентацијата на вториот преоден извештај на ОБСЕ за работата на СЈО, кажа и дека исто така е важно обвинителството да продолжи да работи на независен и професионален начин.
Специјалната јавна обвинителка Катица Јанева истакна дека очекува законот за СЈО да биде донесен што е можно побрзо и да се овозможи Обвинителството да работи со проширени надлежности. Според неа, СЈО во изминатите 3 и пол години се обидува да остане во рамките на мандатот, а со тоа да му овозможи на судот доволно докази за да донесе соодветни пресуди.
Извештајот на ОБСЕ се однесува на работата на СЈО од ноември 2016 до ноември 2018 година, односно набљудувачи на мисијата следеле 20 случаи на обвинителството за кои обвиненија биле поднесени пред јуни 2017 година. Исто така се однесува и за времетраењето на постапките, просечната ефикасност и управување со судските процеси, за правичноста и еднаквоста на оружјата, како и за независноста и непристрасноста на судот.
