Таргетирана помош за оние на кои им е најпотребна , борба со сивата економија, борба против корупцијата и намалување на парафискалните давачки кои во некои случаи се поголеми од даноците, беа главните барања на Сојузот на стопански комори на денешната официјална средба со претседателот на Владата и економскиот тим.
„Во следниве неколку месеци приоритет е директната таргетирана финансиска помош, која е неопходна за опстојување на фирмите и покривање на основните месечни трошоци. Секако тука спаѓа и одложувањето или репрограмирање на кредитите, аконтациите за даноци и другите финансиски оптоварувања минимум до крајот на годината“, истакна Даниела Арсовска, претседател на Комората.
Претседателот на Владата, Зоран Заев рече дека за малите и средни претпријатија државата е тука кога треба да се подаде рака и да биде најдобар сервис на граѓаните. Една од првите грижи на владата како што рече Заев ќе биде и спречувањето на отпуштањата на вработените од страна на работодавачите по завршување на мерката што ја нудеше државата за зачувување на работните места.
„Бројките на отпуштени работници неприродно пораснаа од 12-13 илјади на 22-23 илјади, а по некои статистики и на 30 илјади невработени кои што се случија во овој период, но не се 140 илјади. За нас е важно секое работно место и затоа треба да знаат деловните луѓе дека државата продолжува да помага. Сакаме да им се најдеме, но не можат да очекуваат директна помош и поддршка ако не водат грижа за својот највреден капитал, а тоа се работниците“, изјави Зоран Заев.
Заев рече дека следните пакети на мерки ќе бидат дефинирани единствено во разговори со коморите и синдикатите, со цел да има општествена оправданост на мерките. Вети дека до крајот на мандатот парафискалните давачки ќе се намалат и до 75%.
Инаку сите комори апелираат на побрзо носење нов сет мерки, бидејќи веќе 2 месеци немаат никаква помош, а голем дел од компаниите трпат загуби или престанаа да работат.
