На денешната онлајн седница на Владата се очекува да се ревидира одлуката за влез во Македонија на државјани од Србија, Црна Гора, Босна и Херцеговина и Косово без ПЦР-тест. Инаку поради високиот број заразени во регионот oд завчера Србија, Црна Гора и Босна и Херцеговина завчера на полноќ ја суспендираа одлуката за влез без ПЦР тест, така што се уште останува обврската за приложување негативен ПЦР-тест не постар од 48 часа кога се патува во овие три држави. За македонските државјани влез без медицинска потврда засега е дозволен само во Косово, Албанија и Турција.
Додека нашата Влада не ја ревидира реципрочно одлуката, влезот кај нас за државјаните на земјите од поранешна Југославија кои се надвор од ЕУ ќе биде без тестот. Вчера, на првиот ден од слободниот влез во земјава, сообраќајот беше зголемен на границата со Косово – колони возила имаше на преминот Блаце и поголема раздвиженост од вообичаено на ГП Јажинце, но не многу фреквентно на преминот Табановце на границата со Србија.
