Македонскиот јазик има свој континуитет од 9 век, а тврдењата дека е бугарски дијалект се апсурдни. Ова денеска беше посочено во Небрегово на одбележувањето на 99 годишнината од раѓањето на кодификаторот на современиот македонски јазик, Блаже Конески. Конески е токму тој современик кој на светот му покажа дека македонскиот јазик е рарзличен од останатите.
„Македонскиот јазик си има свој континуитет од 9 век до денес. Со развојот на првата словеска писменост, старословенскиот јазик, преку македонската варијанта на црковно-словенски јазик, 19 век, преродбениците, книгата на Крсте Петков Мисирков „За Македонцките работи“, која што е прва и неофицијална кодификација на македонскиот јазик и последната кодификација на нашиот кодификатор Блаже Конески. Во 1944 година е прогласен за службен јазик на македонската држава на заседанието на АСНОМ“, истакна Елена Јованова Грујоска, директор на Институтот за македонски јазик.
Од Советот за Македонски јазик за тврдењата дека нашиот јазик е бугарски дијалект велат дека тоа е мит кој Бугарите си го провлекувале од средниот век. Се надеваат дека во Бугарија ќе надвладее интелектуалната средина која ќе ја прифати реалноста.
„Морам да ја повторам мислата на Блаже Конески дека не може на едни да им се оддава признание за својот јазик и за својата култура, а на други да им се одзема тоа право. Ние Македонците ќе зборуваме македонски јазик додека постоиме“, изјави Људмил Спасов, претседател на Советот за Македонски јазик.
Претставниците на Владата рекоа дека немаат намера да преговараат за јазикот со никого.
„За македонскиот јазик, идентитет, правото на самоопределување не се преговара и тоа е реалност која целиот свет ја признава“, додаде Роберт Алаѓозовски, национален кооординатор за едно општество и мултикултурализам.
Миле Спиркоски водич во Спомен домот на Конески во Небрегово кажа дека Конески е најголемиот промотор, чувар и бранител на македонскииот јазик.
„Познатиот славист и професор Виктор Фридман вели лингвистичките трудови на Конески се основа за секој славис. Конески ги покажа особеностите кои Македонскиот јазик како посебен го разликуваат од соседните и другите јазици“, потенцираше Миле Спиркоски водич во Спомен домот на Конески.
В година, на 100 годишнината од раѓањето на Конески, се планира во Прилеп и Небрегово да се направи голема Меѓународна конференција.
