Вкупно 14 пунктови за откуп на вишокот тутун треба да бидат отворени денеска. 10 од пунктовите се на Тутунскиот комбинат Прилеп, 3 на „Секе“ и 1 на „Кавекс Балкан“ во Неготино, а утре се очекува да профункционираат и вагите на „Сокотаб“ и „Алијанса“.
„Откупот на вишокот треба да почне денеска. Ако сите фирми отворат, тутунот може да се преземе целосно. Но, за 3 дена не може со отворени 10 ваги. Доколку се презема на 20 пункта со дневна динамика од по 100 тони, би требало да се откупи до 31ви март како што е предвидено со законските измени“, вели претседателот на Сојузот на тутунските здруженија Менде Стомнароски.
Министерот Хоџа завчера изјави дека со добар систем и организација, за 3 дена може да се откупи вишокот тутун.
„Дневната динамика на откупот е околу 400 до 500 тони и поради тоа верувам дека за три дена може да се откупи вишокот. Работата е само да се воспостави добар систем. Убеден сум дека проблемот ќе го решиме и очекувам тоа да биде на најбезболен начин, со учество на сите откупувачи“, рече Хоџа.
Откупот на договорените количини заврши со просечна цена од 165 денари.
