Во салата во спортскиот центар „Борис Трајковски“ во Скопје утрово почна вакцинацијата на пратениците како дел од вработените во критична инфраструктура.
„Денеска како дел од вработени во критична инфраструктура ќе се вакцинираат пратениците и дел од стручните служби кои не се вакцинираа претходниот пат. Ќе ја примаат вакцината на „Спутник“ и денеска процесот е организиран во три групи. Паралелно со нив, во салата тече и вакцинацијата на постарите граѓани над 73 години“, рече министерот за здравство, Венко Филипче.
Претседателот на Собранието, Талат Џафери, очекува дека по имунизацијата ќе се овозможи посоодвбетна работа на Собранието.
„По втората доза која ќе ја земат ќе се овозможи посоодветна работа на Собранието и се надевам од втора половина на мај да се врати нормалниот начин на работа на Собранието секако почитувајќи ги и понатаму одлуките и протоколите“, вели Џафери.
Тој нема информации колку од пратениците ќе се вакцинираат.
„Нивна одлука е кој ќе дојде. Сите се предвидени, а кој како ќе одлучи е нивно“, вели Џафери.
