Бугарскиот копретседавач на комисијата, Aнгел Димитров во одговор на интервјуто на Ѓоргиев, ја обвинува македонската страна дека ја прекинала работата во комисијата. Тој тврди дека токму македонските историчари ги искористиле изборите во Македонија како изговор за блокирање на работата на Мешовитата комисија, а оваа блокада продолжила со изговор дека постои пандемија на коронавирус.
Димитров е категоричен дека надворешниот притисок, пред сѐ од земјите-членки на ЕУ, на кој се надеваат и политичарите и историчарите во Скопје, нема да доведе до промена на бугарската позиција.
„Јас не сум политичар, далеку сум од политичките сфери, но како човек со одредено дипломатско искуство можам да кажам дека не можеме да бидеме под притисок ако јасно ги браниме бугарските позиции“, вели Димитров, кој беше бугарски амбасадор во Македонија.
Тој одговара и на обвинувањата на македонскиот копретседател на Комисијата, Драги Ѓоргиев дека Бугарија не ги признава македонскиот јазик и нација.
„Има признание, но тоа е по Втората светска војна и тоа е гледиштето на бугарската политичка елита. Тоа е во целосна спротивност на тезите што нашите колеги се обидуваат да ги поддржат. Тие се обидуваат да шпекулираат“, вели Димитров.
Според него, најголем проблем е што Мешовитата комисија е сè уште во раниот среден век, т.е. македонската страна го оспорува бугарскиот карактер на Самоиловото царство, што, како што вели, е во спротивност со историските извори и современите достигнувања на светските средновековни студии.
„Нашите колеги не се согласуваат со историските извори. Тие шпекулираат со тези од општествените науки, а не историски. Според нив, во средниот век не била формирана националност, па затоа не може да се каже дека царството на Самоил било бугарско, но истовремено велат дека е македонско – како веќе да е формирана македонска нација. На овој начин тие се контрадикторни со себеси. Кога имаме целосно разидување на гледните точки тогаш се губи довербата во колегијалната и професионална работа на заедничката комисија. Сите напори на македонската страна не се насочени кон барањето контакти и изнаоѓањето разбирање на високо државно ниво“, вели тој.
Димитров најави дека за околу две недели, во јуни ќе се одржи 14-от состанок на заедничката комисија.
„Ако досега нашите македонски колеги повеќе се однесуваа како чувари на митови, сега веќе почнувам да мислам дека започнуваат да се однесуваат како идеолози на антибугарската позиција, на која сме сведоци од минатото лето“, изјави Димитров.
