Со Република Бугарија ние воспоставивме еден нов процес на комуникација, процес кој треба да ја зголеми довербата и треба да ја зголеми соработката не само на политичарите и на ниво на министри, туку и на општествата во целина и гледате дека се формираа работни групи на полето на економијата, на полето на инфраструктурата, образованието, европските интеграции и тие работни групи работат и веќе имаат одредени резултати на ниво на работни групи, истакна денеска во Прилеп премиерот Димитар Ковачесвки.
„Веќе се одржаа работни конференции помеѓу универзитети од двете држави, а исто така и стопанските комори ја почнаа својата соработка. Веќе има и конкретни резултати во зголемување на транспортните квоти помеѓу двете држави и во однос на инфраструктурни проекти за прекугранично поврзување. Од тој аспект сметам дека соработката со Република Бугарија е унапредена во однос на периодот претходно и исто така, граѓаните тоа го знаат, при воената агресија што Русија ја изврши во Украина дека во евакуацијата на нашите граѓани кои беа затекнати во Украина, а кои не ја напуштија земјата навреме иако беа упатени повици од страна на Министерството за надворешни работи во периодот пред да почне воената агресија, во нивното евакуирање голем удел имаше и Министерството за надворешни работи на Бугарија, бидејќи тие имаат големо малцинство таму во бројка од пола милион жители и при евакуацијата на нивните граѓани тие истото тоа го понудија и го организираа и за нашите граѓани. Во однос на односите со Република Бугарија и за другите прашања, тие се водат на ниво на министерства за надворешни работи и кога ќе има одредени резултати, односно документ кој ќе биде прифатлив за двете страни тој ќе биде споделен и со институциите и со јавноста“, рече Ковачевски.
Ковачевски рече дека дека нивото на комуникација помеѓу официјалните политичари и помеѓу официјалните институции е унапредено и се одвивало на ниво на европски вредности.
„Меѓутоа секогаш постојат помали маргинализирани групи и поединци кои што сакаат тие односи да ги направат полоши и чија политичка агенда единствено се заснова на лоши односи со соседите. Јас сум против тоа, Владата е против тоа и Владата во Република Бугарија е против тоа, така да сметам дека соседните држави треба да соработуваат помеѓу себе на сите полиња, а особено оваа криза, оваа воена агресија која што Русија ја изврши во Украина покажа дека Европа мора да биде обединета, треба да биде силна, а тоа секако треба прво да се направи со соседните држави“, рече Ковачевски.
