Новиот претседател на ОК на ВМРО-ДПМНЕ Прилеп, Христијан Тунески, неславно го започна својот мандат. Повеќе од 250 прилепчани, од кои најголемиот дел членови и поддржувачи на партијата на која и тој припаѓа, со своите коментари на официјалната веб страна на ДПМНЕ јасно му кажаа што мислат за неговиот трагикомичен одговор на прес-конференцијата на претседателката на ОО СДСМ-Прилеп, Петра Лукароска, велат во денешното соопштение од ОО СДСМ Прилеп.
„Исто како што му кажаа дека е бесмислено после 5 години власт во Прилеп, тој и градоначалникот Проданоски за ветените проекти се’ уште да зборуваат во идно време: Ќе… Ќе… Ќе….
Тунески не собра храброст да ги остави коментарите на своите сограѓани на увид на јавноста, туку по неговата логика дека тоа што не се гледа не се ни случило, нареди нивно бришење. Еден од избришаните над 250 коментари беше и оној од профилот Сектор комуникации на ОО СДСМ-Прилеп, кој како поддршка на кажаното и во интерес на вистината во оваа прилика го реобјавуваме.
Она што од фрла темна сенка врз мандатот на Тунески како претседател на Општинскиот комитет на ДПМНЕ, е користењето на неговата функција во Советот на Општина Прилеп за остварување на лични цели.
Имено, како член на Комисијата за финансирање, буџет и локален економски развој, Тунески гласал да му се доделат 100.000 денари од општинскиот буџет, за организација на настанот „Че Трчаме“.
Имајќи го предвид фактот дека Тунески е еден од основачите на Здружението „Трча 2023 Прилеп“, несомнено дека станува збор за класичен судир на интереси, односно дека Тунески постапил спротивно на Законот за спречување на конфликт на интереси. Или кажано со други зборови, претседателот на ДПМНЕ, Христијан Тунески, сам себеси си доделил 100.000 денари, пари од граѓаните на општина Прилеп!
Дополнително, ако се знае дека освен овие средства настанот „Че Трчаме“ има и спонзори, како и дека организаторите на секој учесник во трката му наплаќаат котизација од 700 денари плус уште 300 денари за маица со логото на настанот, дека Општина Прилеп ги покрива трошоците за полициско обезбедување и за екипата на Итната медицинска помош, се поставува прашањето каде и за што се трошат сите овие пари?
Со ова, паѓа во вода тезата на Тунески дека неговото учество во организацијата на настанот е на волонтерска основа. Ете вака, почитувани сограѓани, изгледаат лажните волонтери и „загрижени“ локалпатриоти од ДПМНЕ за спортскиот, културниот и, генерално, општествениот развој на Прилеп“, велат од ОО СДСМ Прилеп.
