На денешен ден, пред три години, пукна правата бомба во јавноста. Имено, на деветти февруари 2015 година, тогашниот лидер на опозицијата, а денес премиер, Зоран Заев, на прес-конференција во партиското седиште во Скопје во присуство на голем број новинари и партиски симпатизери ги обелодени првите детали од долго најавуваната бомба.
Тој ги обвини тогашниот премиер Никола Груевски и тогашниот прв човек на УБК, Сашо Мијалков, дека по нивен налог биле прислушувани околу 20.000 граѓани. Исто така, истакна дека покрај прислушуваните опозиционери, новинари, има и министри од Владата, а бил прислушуван и претседателот на државата, Ѓорѓе Иванов.
„Освен премиерот Груевски и Мијалков, прислушувана е комплетната политичка, судска, медиумска и бизнис елита во Македонија од страна на Управата за безбедност и контраразузнавање“, истакна Заев пред три години.
Веднаш по неа јавноста го слушна снимениот разговор меѓу самиот Заев и неговата ќерка, но и разговорот меѓу тогашните министри за внатрешни работи и за финансии, Гордана Јанкулоска и Зоран Ставревски.
„Бомбите“, инаку беа и една од причините за формирање на Специјалното јавно обвинителство или официјално, Јавно обвинителство за гонење на кривични дела поврзани и кои произлегуваат од содржината на незаконското следење на комуникациите, предводено од обвинителката Катица Јанева и уште 12 други обвинители. СЈО е формирано на 15 септември истата година, а на 12 февруари идната, 2016 година, ја објави првата истрага „Титаник“ за изборни нерегуларности, по што следуваа уште десетина други истраги.
