Регулаторната комисија за енергетика денеска го објави новиот ценовник за нафтените деривати што ќе биде во сила сѐ до следниот понеделник.
Од вечерва на полноќ малопродажните цени на бензините еуросупер БС-95 и еуросупер БС-98 се намалуваат за два денари за литар и ќе изнесуваат 62 денари, односно 64 денари за литар.
Малопродажните цени на еуродизел (Д-Е V) и на екстра лесното масло за домаќинство (ЕЛ-1) се намалуваат за 1,5 денар за литар и ќе изнесуваат 54,5, односно 43,5 денари.
Малопродажната цена на мазутот М-1 НС се намалува за 1,495 денари на 28,895 денари за килограм.
Со најновата одлука на Регулаторната комисија, малопродажните цени на нафтените деривати опаднаа за 3,42 отсто во однос на актуелните цени формирани со одлуката од 2 март.
