На 14.03.2022 од страна на полициски службеници од ОВР Прилеп по оперативна акција – Гора во 14.00 часот на патот за с. Оревоец, прилепско пронајдоа предмети од Кривично дело „Шумска кражба“ при што од лицата С.Ш (27) и Е. А (33) од Прилеп, одземени се две запрежни возила – шпедитер- натоварени со по 1,05 м3 огревно дрво.
„Наведените предмети се предмет на сомнение за кривично дело истите се предадени на шумска полиција Прилеп. Лицата се приведени во полициска станица Прилеп и против нив ќе биде поднесена соодветна пријава“, велат од СВР Битола.
Жителите пак велат дека ова повеќе не се издржува. Обвинуваат дека селото веќе со месеци наназад е буквално нападнато од дрвокрадците, а ниту една институција не сака да реагира.
„Ова што се случува во Ореовец е вистински пустош. Со години тука се кради, но како што сега се кради во последниов период или последните месеци никогаш не било вака. Селото е секој ден буквално под континуиран напад на 20 шпедитери. Доаѓаат во групи и целата кражба се одвива доста организирано. Пријавувано е во полиција повеќе пати, но се е залудно. Вчера дојде полицијата бидејќи се крена поголемо внимание, бидејќи се крадеа црковни дрва, да не беше така не знам дали воопшто некој ќе дојдеше. Се плашиме и за својот живот. Ова повеќе не се издржува, овој криминал се случува пред очите на сите и очигледно со нечие одобрение, бидејќи никој не презема ништо“, велат дел од жителите кои сакаат да останат анонимни и бараат помош од надлежните.
