За влакно избегната огромна катастрофа во Прилеп. Брзата интервенција на екипата на ТППЕ Прилеп утринава спречи целосно да биде пеплосана старата прилепска чаршија знаејќи дека сите дуќани се стари и се залепени еден до еден. За многу кратко време беше изгаснат пожарот на еден од дуќаните. За само еден месец исто така бројот на пожари на отворено е зголемен за 300% за разлика од јуни 2023, а пред 2 дена кај месноста Заград позади Марковите Кули се случи огромен пожар кој претставуваше опасност и за манастирот Трескавец и за сите околни викендици.
„Најчесто овие пожари на отворено се од подметнати и несовесни граѓани кои од невнимание мислат дека го контролираат тој пожар на отворен простор, но тие пожари се доста специфични затоа што тие пожари со малку ветар се прошируваат и се доведуваат самите тие што го палат тој пожар во опасност и после бараат пожар од нас, каде што знаеме дека за неколку минути тој пожар со брзина на ветар можи да се прошири и да биде опасност и за објекти и за населено место и за се“, вели Кристијан Момироски, команндир на ТППЕ Прилеп.
Поради овие состојби денеска во Општина Прилеп се одржа и Кризен штаб каде беше нагласена потребата од итно ажурирање на списокот на обучени лица кои во итни случаи би помогнале при гаснење на пожари на отворено и спречување на палењето на стрништа, преку легитимирање на лица кои се движат во поле или шума и в заемна соработка со околните општини за заедничко делување затоа што бројот на прилепските пожарникари во моментов не е доволен.
„Лани од вкупниот број на интервенции на отворен простор 70% беа во Општина Долнени, значи треба да се вклучи и дел од месно население, дел од јавни претпријатија, да се дава било каква помош затоа што нашиот број не е доволен за најголема територија на Македонија која ја покриваме ни се потребни и бројка на луѓе којја ќе се надополни како лани и преклани со сезонски пожарникари, се надеваме на некоја набавка на возила преку некои проекти“, додаде Момироски.
Уште еднаш беше упатен и апел граѓаните да не палат оган на отворен простор поради опасноста по имотот и животите на граѓаните во Општината.
