Граѓаните во Македонија должат вкупно 265,46 милијарди денари (4,32 милијарди евра) на домашните банки, според најновите податоци на Народната банка. Најголем дел од задолжувањето отпаѓа на потрошувачките кредити, кои достигнуваат 133,21 милијарди денари (2,17 милијарди евра), а веднаш зад нив се станбените кредити со 93,7 милијарди денари (1,52 милијарди евра).
Во исто време, македонските банки бележат рекорден профит. Во 2024 година, банкарскиот сектор остварил добивка од 282,8 милиони евра, што е зголемување од 50,3 милиони евра во однос на претходната година. Петте најголеми банки во земјата генерирале 250 милиони евра профит, а најголем дел од приходите произлегуваат од каматите на кредитите.
Најголем кредитор на граѓаните е Стопанска банка АД Скопје, која има одобрено 59,9 милијарди денари за домаќинствата, по што следуваат НЛБ Банка и Шпаркасе банка. Профитабилноста на банките расте благодарение на високите приходи од камати и провизии, додека истовремено трошоците за лоши кредити се намалуваат.
Овие податоци ја отсликуваат растечката финансиска зависност на граѓаните од банките, кои и покрај зголемената задолженост на населението, продолжуваат да остваруваат значителни добивки.
