Македонскиот пасош се најде на 40. место во светот според новото рангирање кое го спроведува консултантската компанија „Henley & Partners“. Истото место, Македонија го дели со Црна Гора и Маршалските Острови.
Во регионот, од македонскиот пасош послаби се патните исправи на Албанија и на Босна и Херцеговина (на 43 место со безвизен режим за 123 земји) и на Косово (63 место и влез во 80 земји). А подобри се пасошот на Грција, шесторангиран поради слободниот влез во 189 земји, на Словенија е десетти (185 држави), хрватскиот 11-ти (184), бугарскиот 15-ти (178) и српскиот е на 34-та позиција со можност без виза да се патува во 139 држави.
Од 227 држави и територии во, границите на 195 без проблем се креваат за имателите на сингапурскиот пасош. Поради тоа патната исправа на Сингапур е на првото место и се смета за најмоќна во светот.
Со јапонски пасош може без виза да се влезе во 193 земји и е на втората позиција. Третото место го делат Финска, Франција, Германија, Италија, Јужна Кореја и Шпанија (192). На четврто се Австрија, Данска, Ирска, Луксембург, Холандија, Норвешка и Шведска (191). Петтата позиција е за пасошите кои обезбедуваат безвизно патување во 190 држави – на Белгија, Нов Зеланд, Португалија, Швајцарија и на Велика Британија. Шести се патните исправи на Австралија и Грција (189), седми на Канада, Малта и Полска (188), осми на Чешка и Унгарија (187).
Американскиот пасош на деветото место, а на амерканските државјани не им е потребна виза за влез во 186 земји. Исто како и на имателите на естонскиот пасош.
Во топ десет се и патните исправи на Летонија, Литванија, Словенија и Обединетите арапски емирати, со кои без проблем се патува во 185 земји.
Државјаните на Авганистан без виза можат да посетат само 26 земји, па нивната патна исправа е на последното 106 место. Едно место подобро котира пасошот на Сирија (27 земји), а на 104-то е на Ирак, чии жители без визи двлегуваат во 31 земја.
