Формирањето на Младински земјоделски задруги е една од можностите како младите да се задржат во своите родни огништа во руралните средини, да бидат поконкурентни на пазарот со своите производи и да имаат исплатлив труд во една водечките економски гранки кај нас. Во тек е формирањето на првата ваква задруга помеѓу млади од општините Крушево и Долнени, преку проектот „Младински зелени социјални претпријатија, нова енергија за руралниот развој“.
„Целта на оваа младинска земјоделска задруга е како да го подобриме локалниот економски развој, како да дојдеме до подем на земјоделството, но и онаа најважна цел, како да ги задржиме младите токму во овие региони. Во текот на работењето со овој проект младите пројавија навистина голем интерес за да се формира оваа младинска земјоделска задруга и бенефитот е тоа што младите заеднички преку учество ќе си овозможат подобар пласман на пазарот, поделени трошоци во текот на работењето во земјоделството, заедничка набавка на репроматеријали, заедничко користење на регрутација“, истакна Анастасија Смиле ЛАГ АГРО ЛИДЕР.
Во тек е регрутација на младите кои биле наголемо заинтересирани за оваа иницијатива.
„Имавме 5 теми, тоа е компостирање, калифорниски црви, коприва, пепел и отпадно масло. Доста креативно решение имаме за отпадното масло и за искористувањето на компостот, но сите решенија се одржливи, можат да се развиваат, така што би кажал дека за она што ние го работевме младите имаат нивни идеи да ги доработуваат, да ги прошируваат и да го проблематизираат бизнисот, односно да го зафатат од сите агли како тој понатаму би се развивал“, кажа Филип Димкоски, агроном.
Младите пред се барале сигурност дека она што тие ќе го сработат ќе имаат вистински бенефит од истото. Главен услов за нивно останување во Македонија и придонесување за развој на државата.
