Од денеска во потрагата по малиот Петар Џобоски кој исчезна во близина на селото Врбско во Мариово се приклучи и Дирекцијата за заштита и спасување (ДЗС).
„Во потрагата се ангажирани седум припадници на ДЗС од кои четири од Тимот за брз одговор за спасување од планини од ПОЗС – Битола, еден припадник од Тимот за спасување од високи објекти од ПОЗС – Прилеп и двајца вработени од Секторот за оператива и логистика“, соопшти ДЗС.
На 10-годишниот Петар, кој што е дете со посебни потреби и тешко комуницира, трагата му се губи во петокот по 16 часот.
Повеќе од 100 полицајци, противпожарни и спасителни служби, ловџии, но и граѓани доброволци од неколку градови веќе четири дена се во потрага по Петар, во која беше вклучен и хеликоптер, а и со дрон се снимаше теренот каде се бара детето.
МВР објави и телефонски број на дежурната служба во село Витолиште, 071 268-594, каде што граѓаните можат да се обратат за координација.
Во моментов потрагата се одвива под отежнати околности поради снежните врнежи и ниските температури.
