НОВО во GALA WASH Прилеп !!! Перење на патосници - Антибактериски мирис - Црнило за гуми
На 13 септември, во срцето на Прилеп- на платото кај Градскиот сат, ќе се одржи седмото издание на „Млеко“ – единствениот фестивал во Македонија посветен на занаетчиски млечни производи со локален карактер и висок квалитет.
Во фокусот се: бели и биени сирења, урда, кашкавали – направени од мали производители, со знаење што се пренесува низ генерации. До нив: селекција на внимателно одбрани придружни вкусови – леб, мед, зачини, сезонско овошје, вино и разни занаетчиски производи што природно се надополнуваат.
„Млеко“ е веќе препознатлива сцена за сите што го ценат автентичното, организиран од Слоу Фуд Прилеп, со поддршка од Слоу Фуд Македонија, и секоја година носи нов квалитет и нови содржини.
Годинава, фестивалот добива нова енергија со нова генерација активисти – млади луѓе кои ја гледаат храната како простор за промена: начин да се зачуваат вредностите, да се поддржат вистинските производители и да се пренесе идејата за квалитет кон иднината.
На “Млеко 2025” ќе можете да пробате мали серии автентични млечни производи – бели и биени сирења, урда, зрели кашкавали – директно од производителите, да разговарате со нив за процесите, потеклото и вредностите што стојат зад секој залак.
Ќе се одржи конференција: Гласот на сточарите, со панел дискусии: Предизвици во процесот на регистрација, и Човечки капацитети во сточарството.
За најмладите, ќе има едукативно катче со креативни активности, а во текот на денот ќе се одржат работилници и изложба на ученички проекти инспирирани од храната и земјата.
Во попладневните часови, новата генерација активисти ќе ја претстави својата верзија на „диско супа“ – настан со порака, а сето тоа ќе биде придружено со жива музика и опуштена урбана атмосфера што го одразува духот на фестивалот.
