По повод 3 Декември – Меѓународниот ден на лицата со попреченост, група ученици од СОЕПТУ „Кузман Јосифоски – Питу“ од Прилеп го снимија документарниот филм „Нотите на животот“, во кој се раскажува инспиративната приказна за Филип Николоски, млад музичар со церебрална парализа.
Самиот Филип е протагонист во филмот, а неговата посветеност, дисциплина и љубов кон музиката се силен доказ дека попреченоста не е пречка за талентот и напредокот.
Филип Николоски е роден во Прилеп на 11.10.1999 година, поранешен ученик во СОЕПТУ „Кузман Јосифоски – Питу“ од Прилеп и моментално вработен во Општа болница Прилеп. Свири на клавијатури, пее, а зад себе има и 3 свои песни: „Тебе те нема“ во аранжман на Рубин Димкоски, текст и музика Гоце Балада, потоа „Вози вози ме“ во аранжман повторно на Рубин Димкоски и текст на Душко Темелкоски, и неговата последна песна „Само на добро нека е“ за која аранжманот и музиката ги направи Рубин Димкоски, а текстот е од Душко Темелкоски. „Само на добро нека е“ ја преработи и култната македонска група „Меморија“, кои заедно со Филип ја испеаја на концертот по повод 40 години нивно постоење.
